JUAN MATA: ATAMBULISHWA RASMI.

KUVAA JEZI NAMBA 8!!

JUMANNE USIKU KUANZA RASMI NA ROONEY, ROBIN VAN PERSIE!!

MCHEZAJI MPYA wa Mabingwa Manchester United, Juan Mata, Leo ametambulishwa rasmi  na kupewa Jezi Namba 8 huku mwenyewe akisema bado yapo matumaini ya kutetea Ubingwa wao.

Man United wapo Nafasi ya 7 kwenye Ligi wakiwa Pointi 14 nyuma ya Vinara Arsenal huku Mechi zikiwa zimebaki 16.

Mata, ambae amejiunga na Man United hivi Juzi akitokea Chelsea kwa Dau la Pauni Milioni 37.1 ambalo ni Rekodi kwa Man United, huenda akacheza Mechi yake ya kwanza Jumanne Usiku Uwanjani Old Trafford dhidi ya Cardiff City kwenye Ligi Kuu England akivaa Jezi yake Namba 8 ambayo kabla ilikuwa ikivaliwa na Anderson alieenda Fiorentina kwa Mkopo.

Mata, mwenye Miaka 25 na anaechezea Timu ya Taifa ya Mabingwa wa Dunia Spain, amesema: “Ninachopenda kuhusu Klabu hii ni ile imani yao ya kutokata tamaa. Ingekuwa Klabu nyingine iko kwenye hali hii, ingekuwa ngumu kurudi na na kuchukua Nafasi ya Kwanza, lakini Klabu hii inaweza. Huo ndio msimamo thabiti wa Man United, Siku zote wanapigania Mataji, Siku zote wanashinda toka hali ngumu!”

Vile vile, Mata alisema anangojea kwa hamu kucheza na mwenzake Wayne Rooney.

Ameeleza: “Kwangu mimi, yeye ni mmoja wa Wachezaji Bora katika Historia ya Nchi hii. Huwezi kuamini Uchezaji wake. Ni Straika anaeweza kufunga, kusaidia kufunga na kurudi kwenye Kiungo kusaka Mipira. Nitajaribu kushirikiana nae kwa kadri ya uwezo wangu na kusaka mapengo kwenye Difensi za Wapinzani. Nadhani staili yangu nzuri ni kufanya hivyo! ”

Mata, ambae alitokea Valencia ya Spain na kujiunga na Chelsea ambayo aliifungia Mabao 32 katika Mechi zaidi ya 130, ameichezea Timu ya Taifa ya Mabingwa wa Dunia Spain Mechi 32.

Akiongelea ujio wa Mata, Meneja wa Man United David Moyes amesema ameshangazwa kuweza kumsaini Mchezaji Bora kama Juan Mata kwenye Dirisha la Uhamisho la Januari.

Moyes amesema: “Nimefurahishwa. Tulidokezwa Mwezi mmoja au miwili nyuma lakini sikutegemea kama tutafanikiwa. Tulipopata nafasi kumchukua tuliingia moja kwa moja. Watakuja Wachezaji kama yeye baadae.”

ROBIN VAN PERSIE NA WAYNE ROONEY WARUDI!

Wayne Rooney na Robin van Persie wanaweza kurudi kuichezea Manchester United Jumanne Usiku Uwanjani Old Trafford dhidi ya Cardiff City kwenye Ligi Kuu England.

Rooney amekuwa nje ya Uwanja tangu Januari Mosi Man United walipofungwa na Tottenham alipoumia Nyonga na Van Persie yuko nje tangu Desemba 10 alipoumia Paja kwenye Mechi ya UEFA CHAMPIONZ LIGI dhidi ya Shakhtar Donetsk.

Lakini Mastaa hao wawili wamepona na huenda wakapangwa pamoja na Mchezaji mpya Juan Mata dhidi ya Cardiff City ambayo ipo chini ya Meneja Ole Gunnar Solskjaer, Nguli wa Man United, ambae ni Meneja mpya hapo Cardiff City.

LIGI KUU ENGLAND

RATIBA:

[Saa za Bongo]

Jumanne Januari 28

2245 Man Utd v Cardiff

2245 Norwich v Newcastle

2245 Southampton v Arsenal

2245 Swansea v Fulham

2300 Crystal Palace v Hull

2300 Liverpool v Everton

Jumatano Januari 29

2245 Aston Villa v West Brom

2245 Chelsea v West Ham

2245 Sunderland v Stoke

2245 Tottenham v Man City

MSIMAMO:

NA	TIMU	P	GD	PTS
1	Arsenal	22	24	51
2	Man City	22	38	50
3	Chelsea	22	23	49
4	Liverpool	22	25	43
5	Tottenham	22	3	43
6	Everton	22	15	42
7	Man Unit3d	22	9	37
8	Newcastle	22	4	36
9	Southampton	22	4	31
10	Aston Villa	22	-7	24
11	Hull	22	-6	23
12	Norwich	22	-17	23
13	West Brom	22	-5	22
14	Stoke	22	-14	22
15	Swansea	22	-6	21
16	Crystal Palace	22	-17	20
17	Fulham	22	-26	19
18	West Ham	22	-11	18
19	Sunderland	22	-15	18
20	Cardiff	22	-21	18