MISWADA MIWILI YA HABARI YA MWAKA 2015 YAONDOLEWA BUNGENI

Juhudi za wadau wa habari kuwasilisha ombi kwa Spika wa Bunge, Anne Makinda wakitaka miswada miwili ya habari ya mwaka 2015 iwasilishwe kwa mfumo wa kawaida, zimezaa matunda baada ya Serikali kuamua kuiondoa kabisa miswada hiyo, sasa haitajadiliwa tena katika mkutano wa 19 wa Bunge unaoendelea mjini Dodoma.

Miswada hiyo ilikuwa iwasilishwe chini ya hati ya dharura Jumanne ijayo lakini jana ofisi ya Bunge ilitoa ratiba mpya inayoonyesha kuwa miswada hiyo haitajadiliwa tena, huku Mwanasheria Mkuu wa Serikali (AG), George Masaju akisema uamuzi huo umetokana na matakwa ya waandishi wa habari.

Taarifa zilizolifikia gazeti hili zinaeleza kuwa uamuzi huo ulifikiwa katika kikao cha kamati ya uongozi kilichofanyika juzi usiku, ambapo pamoja na mambo mengine kilipendekeza kuondolewa kwa miswada hiyo, kushauri isomwe kwa mara ya kwanza bungeni, kisha ipelekwe kwa wadau ili waweze kuijadili.

Tangu mkutano wa 19 wa Bunge kuanza na ratiba kuonyesha kuwa miswada hiyo ambayo ni; Muswada wa Sheria ya Kupata Habari wa mwaka 2015 na Muswada wa Sheria ya Vyombo vya Habari, wadau wa habari walikipinga kitendo hicho  kuiomba Serikali ibadili msimamo huo kwani kufanya hivyo kutawanyima wananchi fursa ya kutoa maoni juu ya miswada hiyo kabla ya kuwa sheria.

Alipoulizwa sababu za Serikali kuiondoa miswada hiyo Masaju alijibu kwa kifupi, “Aaah siyo nyinyi (waandishi wa habari) ndiyo mmetaka bwana, ndiyo hivyo.”

Alifafanua kuwa miswada hiyo itasomwa kwa mara ya kwanza bungeni na kurudishwa kwa wadau na kwamba utapangiwa siku nyingine ya kujadiliwa bungeni.

Siku tatu zilizopita Kaimu Kiongozi wa Kambi ya Upinzani bungeni, Tundu Lissu aliliambia gazeti hili kuwa Serikali ilipanga kuiwasilisha miswada hiyo bungeni ‘kimafia’ ili wabunge wasijue kilichoandikwa.

Akizungumzia kwa niaba ya Lissu jana, mbunge wa Ubungo, John Mnyika alisema, “Ni kweli miswada hii imeondolewa isipokuwa italetwa bungeni na kusomwa kwa mara ya kwanza na baada ya hapo ipelekwe kwa wadau kuijadili.”

Mnyika aliwataka wadau wa habari kuhakikisha kuwa wanaipitia miswada hiyo kwa umakini na kuondoa mambo yote yanayoonekana ‘kuwaminya’, ili ikiletwa tena bungeni iwe katika ubora na hatimaye kupitishwa kuwa sheria.

Mbunge huyo pia aligusia miswada Sheria ya Miamala ya Kielektroniki wa mwaka 2014 na muswada wa Sheria ya Makosa ya Mtandao wa mwaka 2015 iliyosomwa kwa mara ya kwanza jana, kupangiwa kujadiliwa bungeni wiki ijayo.

Alisema kuwa miswada hiyo iliyowasilishwa kwa hati ya dharura ina changamoto nyingi zinazotakiwa kutolewa maoni na wadau na kulitaka Bunge kuiweka kwenye tovuti yake ili ijadiliwe na wadau kabla ya kujadiliwa bungeni.

“Miswada hii pia inagusia uhuru wa vyombo vya habari na haki nyingi sana. Kinachotakiwa sasa ni bunge kutangaza ratiba ya kukusanya maoni ya wananchi ambao miswada hii inawagusa ili watoe maoni yao.”

“Hilo linaweza kufanyika hapahapa Dodomamaana miswada hii inajadiliwa wiki ijayo na kupitishwa. Hilo lisipofanyikakutakuwa na malalamiko makubwa na huenda tukapitisha sheria ambayo baadayetutalazimika kuiboresha.”