MAMENEJA WA SOKA: TAALUMA HATARI KWA ‘KUMWAGA UNGA!’

ENGLAND: MAMENEJA WAWILI TU WAMEDUMU ZAIDI YA MIAKA 5!

MSIMU HUU LIGI KUU ENGLAND WAWILI NJE, NANI KUFUATIA??

LMA YALIA: “NI AIBU!”

MSIMU wa Soka wa 2013/14 haujafikia hata nusu huko England lakini tayari Mameneja 9 toka Madaraja ya Ligi ya juu manne wameshamwaga unga huku kwenye Ligi Kuu England Martin Jol wa Fulham na Chris Hughton wa Norwich City wakiwa wamekalia kuti kavu.

Ligi Kuu England Msimu huu tayari imeshapoteza Mameneja wawili ambao ni Paolo Di Canio aliefukuzwa na Sunderland hapo Septemba 22 na Ian Holloway alieachia ngazi Crystal Palace baada maji kumfikia shingoni.

Di Canio alikuwa na Sunderland kuanzia Machi Mwaka huu na Holloway alidumu chini ya Mwaka mmoja kwenye kazi yake na Crystal Palace.

Kutodumu kwa mda mrefu kwa Mameneja huko England kunaelezwa kunatokana na Wamiliki Vilabu na Mashabiki wao kutaka mafanikio ya haraka pamoja na kuwa na Viongozi wasiokuwa na subira na hili huwafanya Mameneja watimuliwe kila kukicha.

Huko Blackburn Rovers, Klabu ambayo inamilikiwa na Wauza Kuku toka India wenye Kampuni ya Venky, wameshakuwa na Mameneja watano katika Kipindi cha chini ya Miaka miwili na nusu.

Hata Meneja wao wa sasa, Gary Bowyer, yupo kwenye wasiwasi wa kung’oka dakika yeyote ile.

Zipo Klabu nyingi huko England ambazo Meneja hawezi kudumu kwa Miaka miwili na kama akifikisha hapo basi ni wazi atajiona amefanikiwa.

Mfano ni Chelsea ambapo tangu Meneja wao wa sasa, Jose Mourinho, aondoke Mwaka 2007 na kurudi mwanzoni mwa Msimu huu hapo kati wameshapita Mameneja 7.

Akielezea hali hii, Mkuu wa LMA [League Managers Association], Chama cha Mameneja wa Ligi, Richard Bevan, ambae aliwahi kuielezea hali hiyo kama ni aibu, amesema”: “Sielewi jeuri hii ya kwenye Soka imetokea wapi wakati kwenye Taaluma nyingine haipo….wasiwasi huu wa kutimuliwa ajira unaharibu taaluma hii!”

Takwimu zilizotolewa na LMA zinaonyesha muda wa Meneja kudumu kwenye kazi yake ni wastani wa Mwaka 1.84 na kwenye Ligi Kuu England ni Mwaka 2.81, LIGI 1 ni 1.37 na LIGI 2 ni 2.57.

Kwa Msimu uliopita, kwenye Ligi kwa Madaraja yote, Mameneja 43 walitimuliwa na 20 walijiuzulu ukilinganisha na 33 waliofukuzwa na 16 kujiuzulu kwa Msimu wa nyuma yake.

Rekodi ya kutimuliwa kwa Mameneja wengi katika Msimu mmoja ni ile ya 2001/2 ambapo Mameneja 53 walifukuzwa.

Mwezi Machi ndio umetambuliwa kuwa ndio Mwezi hatari kwa Mameneja kwani hapo ndipo wengi hukosa kazi wakati Klabu zikihaha kutaka kujinusuru kushushwa Daraja kwa Ligi zinazomalizika Mwezi Mei.

Kwa sasa ni Mameneja wawili tu ndio wamedumu kwenye vibarua vyao kwa zaidi ya Miaka mitano na hao ni Arsène Wenger wa Arsenal na Paul Tisdale wa Exeter City.

Msimu uliopita hali hiyo kidogo ilikuwa na nafuu kwani walikuwepo Sir Alex Ferguson, David Moyes na Tony Pulis lakini hao sasa wamestaafu, kubadili Klabu na mwingine kuachia ngazi.