CCM yajimarisha, yateua makatibu 27

Nape Nnauye

KAMATI Kuu ya Halmashauri Kuu ya Chama Cha Mapinduzi (CCM) imeendelea na kikao mjini hapa ambapo moja ya ajenda za kikao hicho ni kujadili mwenendo mzima wa mchakato wa Katiba mpya.

Pia Kamati hiyo imewateua makatibu 27 wa wilaya ili kujaza nafasi zilizoachwa wazi kutokana na sababu mbalimbali ikiwemo vifo na kustaafu, lakini lengo kuu likiwa kukiimairisha chama kuanzia ngazi za chini.

Akizungumza jana, Katibu wa NEC, Itikadi na Uenezi wa chama hicho, Nape Nnauye alisema kikao hicho kimeanza juzi chini ya Mwenyekiti wake, Rais Jakaya Kikwete.

Alisema kikao hicho kimelazimika kufanyika siku moja na nusu kutokana na kutokamilisha kazi ya kujadili ajenda mbalimbali ambazo zitatakiwa kupelekwa katika kikao cha NEC kilichotarajiwa kuketi jana  mchana.

Alisema pamoja na kujaza nafasi hizo za makatibu, pia NEC ilifanya uteuzi wa wagombea wa nafasi za uenyekiti  na ujumbe wa Halmashauri Kuu  (NEC) ambao nafasi zipo wazi baada ya waliokuwa wakishikilia kufariki dunia.

Aliwataja walioteuliwa kushika nafasi ya makatibu wa wilaya kuwa ni Omar Mtuwa, Acheni Maulid, Mohammed Gwama, Amina Imbo, Barnabas Nyerembe, Agnes Mfunya, Raphael Maumba, Naboth Manyonyi na Hamdani Haji Machano.

Wengine ni Agnes Kasela, Albert Stima, Nobert Kibaji, Kulwa Omar Milonge, Zitta Malyaga, Hamis Kananda, Ali Yusuf Salum, Magreth Mtatiro na Tabu Ligwesa Zamalu. Pia wamo Julius Mbwiga, Rhoda George, Lucy Boniface Shee, Helena Chacha, Mafunda Hamis Ali, Doris Kimambo, Elizabeth Kasmiry, Shaibu Ally Mtawa na Mariam Yusuf.

Katibu huyo wa Uenezi alisema kutokana na Kamati Kuu kushindwa kukamilisha kazi yake itaendelea kukamilisha baadhi ya ajenda. Alizitaja baadhi ya ajenda hizo kuwa ni mchakato wa Katiba  pamoja na hali ya kisiasa nchini na ajenda ya uteuzi na ya namna ya CCM itakavyojipanga kwa ajili ya kupata ushindi katika uchaguzi wa serikali za mitaa zimejadiliwa pamoja na utekelezaji wa ahadi walizozitoa wakati wa uchaguzi uliopita.

Alisema katika mchakato wa Katiba, Kamati Kuu itaangalia kazi yote iliyofanyika, ilipofikia na nini kifanyike kuendelea mbele.

“Kikao hiki si cha kumjadili mtu, bali ni kujadili hoja za msingi kwa ajili ya kujenga Taifa, msisikilize maneno ya mtaani sisi hatuna muda wa kujadili watu bali tunajadili hoja, siku zote maneno hayaisaidii nchi, tayari Katiba Inayopendekezwa imeisha, sasa tunaangalia yaliyo mbele,” alisema.

Alisema CCM ni chama kikubwa ambacho hakina utamaduni wa kujadili watu au nani kasema nini kwani mchakato umekamilika kwa ushindi mzuri. Alisema wanajadili hoja zitakazolijenga taifa na kulileta taifa kuwa moja na kuliwezesha kusonga mbele.

Kauli hiyo ya Katibu wa NEC, Itikadi na Uenezi, Nape Nnauye, inamaliza uvumi kwamba, pamoja na mengi mengine, vikao hivyo vililenga kujadili wana-CCM wanaotajwatajwa kutaka kuwania urais katika Uchaguzi Mkuu wa mwaka kesho.

Hadi sasa CCM ndicho chama pekee ambacho baadhi ya wanachama wake wameibuka na kutangaza nia ya kuwania urais katika uchaguzi mkuu wa mwakani, huku wengine wakikaririwa kueleza nia akiwemo Waziri Mkuu, Mizengo Pinda.

Wana CCM wengine waliotangaza au kuonesha nia ya kuwania urais ni January Makamba (Naibu Waziri wa Mawasiliano, Sayansi na Teknolojia), Dk. Hamisi Kigwangalla (Mbunge wa Nzega), Edward Lowassa (Mbunge wa Monduli na Waziri Mkuu wa zamani), Stephen Wassira (Waziri wa Nchi, Ofisi ya Rais, Sera na Mahusiano), Bernard Membe (Waziri wa Mambo ya Nje na Ushirikiano wa Kimataifa), Frederick Sumaye (Waziri Mkuu mstaafu) na Mbunge wa Sengerema, William Ngeleja.

Source:Habarileo